دبئی میں عمارت سے گرتی حاملہ بلی کو بچانے والے پاکستانی کیلئے انعام کا اعلان

حال ہی میں دبئی میں واقع ایک عمارت سے گرتی حاملہ بلی کو بچانے والے افراد کے لیے متحدہ عرب امارات کی حکومت کی جانب سے بڑے انعام کا اعلان کردیا گیا۔

گزشتہ دنوں سوشل میڈیا پر ایک ویڈیو تیزی سے وائرل ہوتی دکھائی دی تھی جس میں دبئی کی ایک عمارت کی بالکونی سے گرنے والی حاملہ بلی کو 4 افرادنے ریسکیو کیا تھا، ان افراد نے بیڈ شیٹ پھیلاکر بلی کو اونچی عمارت سے گرنے سے بچایا تھا۔ ویڈیو وائرل ہونے کے بعد، سوشل میڈیا صارفین کی جانب سے بلی کو ریسکیو کرنے والے افراد کی کوششوں کو سراہتے ہوئے انھیں ہیرو قرار دیا جارہا تھا۔

بعد ازاں اس وائرل ویڈیو کلپ نے دبئی کے حکمران شیخ محمد بن راشد آل مکتوم کی توجہ بھی اپنی جانب مبذول کروالی،شیخ محمد بن راشد نے اپنے تصدیق شدہ اکاؤنٹ پر ویڈیو شیئر کرتے ہوئے بلی کو بچانے والے افراد کی شناخت کرنے میں مدد کی درخواست کی۔ شیخ محمد بن راشد نے اپنی ٹوئٹ میں لکھاکہ اپنے شہر میں دردمندی کی یہ مثال دیکھ کر خوشی کے ساتھ فخر ہوا، جو بھی ان بے نام ہیرو کی شناخت رکھتا ہو برائے مہربانی ان کا شکریہ اداکرنے میں ہماری مدد کریں۔

اب ان چاروں افراد کی شناخت ہوگئی ہے جن میں سے ایک پاکستانی ہیں جن کا نام عاطف محمود ہے، دوسرے شخص کا تعلق مراکش سے ہے جو کہ ویڈیو میں سکیورٹی گارڈ کی وردی پہنے ہوئے ہے، دیگر 2افراد نصیر شہاب اور محمد راشد ہیں جن کا تعلق بھارتی ریاست کیرالہ سے ہے۔

اماراتی حکومت کی جانب سے چاروں افراد کو 50 ہزار درہم (22 لاکھ 74ہزار سے زائد پاکستانی روپے) ان کی ہمدردی کے عوض دیے گئے ہیں۔