عمان: غیر ملکی اساتذہ کے حوالے اہم خبر

مسقط: سلطنت عمان نے غیر ملکی اساتذہ کی تعداد کم کرنے کا فیصلہ کر لیا ہے۔

تفصیلات کے مطابق عمان نے غیر ملکی اساتذہ کی جگہ مقامی شہری بھرتی کرنے کا فیصلہ کیا ہے، وزارت برائے افرادی قوت نے عمان میں ملازمت کے تقریباً ایک ہزار مواقع فراہم کر دیے۔

وزارت برائے افرادی قوت کے ایک آن لائن جاری کردہ بیان میں کہا گیا ہے کہ وزارت برائے افرادی قوت، وزارت تعلیم کے تعاون سے مختلف شعبوں میں 997 تدریسی ملازمتوں کے موقع فراہم کر رہی ہے۔

ان مواقع میں 68 عربی زبان کے اساتذہ، 203 ریاضی کے اساتذہ، 26 کیمسٹری اساتذہ، 34 طبیعیات کے اساتذہ، 67 حیاتیات کے اساتذہ، 107 موسیقی کے ماہر اساتذہ اور 492 فرسٹ فیلڈ اساتذہ کی سیٹیں شامل ہیں۔

وزارت برائے افرادی قوت کے مطابق یہ ملازمتیں عمانی شہریوں کے لیے فراہم کی جا رہی ہیں، وزارت کے منصوبے کے تحت عمانی اساتذہ کو غیر ملکی اساتذہ کی جگہ بھرتی کیا جائے گا۔

واضح رہے کہ کرونا وبا کے پیش نظر تمام خلیجی ممالک نے سرکاری، نیم سرکاری اور نجی شعبوں میں غیر ملکیوں کی جگہ اپنے شہریوں کو کھپانے کو ترجیح دی ہے۔

خلیجی ممالک کی اس نئی پالیسی کی وجہ سے ان ممالک میں مقیم ہزاروں غیر ملکی اب تک اپنی نوکریوں سے ہاتھ دھو چکے ہیں، خدشہ ہے مزید غیر ملکی خلیجی ممالک میں نوکریوں سے محروم ہوں گے۔