امریکا بھارت کی مدد کے لیے آگے آ گیا، بڑا اعلان

واشنگٹن: امریکا نے کرونا کیسز اور اموات میں اضافے کی نہایت تشویش ناک صورت حال پر بھارت کی مدد کا اعلان کر دیا ہے۔ امریکی محکمہ خارجہ نے کرونا صورت حال تشویش ناک قرار دیتے ہوئے اعلان کیا ہے کہ کرونا کے خلاف جنگ میں امریکا بھارت کی اعلیٰ سطح پر مدد کرے گا۔

امریکی محکمہ خارجہ نے جاری بیان میں کہا کہ بھارت میں کرونا کی صورت حال دنیا کے لیے تشویش کا باعث ہے، ہم بھارت کو ہر ممکن سہولتیں فراہم کریں گے۔

واضح رہے کہ بھارت میں گزشتہ چوبیس گھنٹوں کے دوران کرونا کے 3 لاکھ 46 ہزار کیسز رپورٹ ہوئے ہیں، جب کہ ایک دن میں کرونا انفیکشن سے 2624 اموات واقع ہوئیں۔

بھارت کا دارالحکومت نئی دہلی کرونا وبا سے سب سے ز یادہ متاثر ہے، نئی دہلی میں ایک دن میں ریکارڈ 353 افراد جان سےگئے، جب کہ 27 ہزار کیسز رپورٹ ہوئے۔بھارت میں کرونا کی ہلاکت خیزی، امیر شہری جان بچانے کے لیے ملک سے بھاگنے لگے

نئی دہلی میں اسپتالوں میں آکسیجن کی قلت بھی شدید ہو گئی ہے جب کہ مریضوں کے لیے بستر بھی کم پڑ گئے ہیں، دارالحکومت کے 3 اسپتالوں نے ایک گھنٹے کی آکسیجن رہ جانے کا بھی اعلان کر دیا تھا۔

بھارت کی دیگر ریاستوں مہاراشٹرا، کیرالا، اترپردیش، اور کرناٹک میں بھی صورت حال تشویش ناک ہے، ایک دن میں ان ریاستوں میں بھی ریکارڈ کیسز رپورٹ ہوئے۔

کرونا کی وبا میں خطر ناک حد تک اضافے کے بعد بھارت کے امیر افراد ملک سے نکلنے کی کوششیں کر رہے ہیں، مسافروں کی تعداد میں اضافے کی وجہ سے فضائی سفر کے کرایوں میں ہوش رُبا اضافہ ہو گیا ہے، جب کہ نجی جہازوں کی مانگ بھی بڑھ گئی ہے۔