کیا کرونا ویکسین کی 2 خوراکیں ناکافی ہوں گی؟

واشنگٹن: امریکی فارما سیوٹیکل کمپنی فائزر کا کہنا ہے کہ ایک سال کے اندر کرونا وائرس ویکسین کی تیسری ڈوز لگانے کی ضرورت بھی پڑ سکتی ہے، اس کا انحصار کرونا وائرس کی نئی اقسام پر ہوگا۔

امریکی دوا ساز کمپنی فائزر کا کہنا ہے کہ کرونا وائرس ویکسین کی ایک سال کے اندر تیسری ڈوز لگانے کی ضرورت بھی پڑ سکتی ہے۔ فائزر کمپنی کے سربراہ کا کہنا ہے کہ عوام کو ممکنہ طور پر فائزر ویکسین کی 6 سے 12 ماہ کے اندر ایک اور ڈوز لگوانی پڑ سکتی ہے۔ انہوں نے کہا کہ کرونا ویکسین کی سالانہ بنیاد پر ڈوز لگانے پر تحقیق بھی جاری ہے۔

سربراہ نے مزید کہا کہ کرونا ویکسین کی تیسری ڈوز لگوانے سے متعلق فیصلے میں کرونا وائرس کی نئی اقسام اہم کردار ادا کریں گی۔ تحقیق کاروں کو فی الحال اندازہ نہیں کہ کرونا ویکسین کی 2 خوراکیں وائرس کے خلاف کب تک تحفظ فراہم کر سکیں گی۔