افغانستان: تین خواتین پولیو ورکرز کو قتل کردیا گیا

افغانستان میں تین خواتین پولیو ورکرز کو قتل کردیا گیا۔پولیو مہم میں شامل تین خواتین ورکرز کو صوبہ ننگرہار کے شہر جلال آباد میں فائرنگ کے دو مختلف واقعات میں قتل کیا گیا ہے۔

فائرنگ کا پہلا واقعہ صبح ساڑھے گیارہ بجے پیش آیا جہاں جلال آباد کے علاقہ مجبور آباد میں نامعلوم مسلح ملزمان نے پولیو ڈیوٹی پر مامور ایک خاتون کو فائرنگ کرکے قتل کیا۔

فائرنگ کا دوسرا واقعہ اس کے ایک گھنٹے بعد پیش آیا اور جلال آباد کے علاقے لال قاسم آغا میں نامعلوم افراد نے فائرنگ کرکے دو خواتین ورکرز کو قتل کردیا۔

خواتین ورکرز کی شناخت بصیرا، ثمینہ اور نگینہ کے نام سے ہوئی ہے جب کہ تاحال کسی گروپ نے واقعے کی ذمہ داری قبول نہیں کی ہے۔