برطانوی وزیراعظم بورس جانسن قرنطینہ میں چلے گئے

برطانوی وزیراعظم بورس جانسن نے خود کو دو ہفتوں کے لیے قرنطینہ کر لیا ہے۔

غیر ملکی خبر رساں ادارے کے مطابق بورس جانسن ایک ایسے شخص کے ساتھ رابطے میں تھے جن کا حال ہی میں کورونا وائرس کا ٹیسٹ مثبت آیا ہے اور اب انہوں نے خود کو بھی قرنطینہ کر لیا ہے۔ اس حوالے سے برطانوی وزیر اعظم بورس جانسن کا کہنا ہے کہ ایسے شخص جن کا کورونا ٹیسٹ مثبت آیا ہے، ان کے ساتھ رابطے میں رہنے کے بعد خود کو 2 ہفتوں کے لیے آئسولیٹ کر لیا ہے لیکن میں بلکل ٹھیک ہوں۔ بورس جانسن نے مزید کہا کہ ان دو ہفتوں کے دوران تمام تر حکومتی انتظامات ویڈیو کانفرنس کالنگ ایپ زوم کے ذریعے سر انجام دوں گا۔ خیال رہے کہ برطانوی وزیراعظم کو اپریل میں کورونا وائرس کی تصدیق ہوئی تھی جس کے بعد وہ تقریباً 4 روز انتہائی نگہداشت یونٹ (آئی سی یو) میں زیر علاج بھی رہے تھے۔ برطانیہ میں کورونا کی صورتحال
برطانیہ میں کورونا وائرس سے متاثر ہونے والے افراد کی مجموعی تعداد 13 لاکھ 70 ہزار تک جا پہنچی ہے جب کہ وائرس سے ہونے والی ہلاکتوں کی تعداد 51 ہزار 900 سے تجاوز کر چکی ہے۔