کورونا وائرس : دبئی حکومت کا عوام کی سہولت کیلئے بڑا فیصلہ

دبئی : امارت دبئی نے 22 اکتوبر سے شادیوں اور سماجی تقریبات کے انعقاد کی اجازت دینے کا فیصلہ کیا ہے لیکن اس ضمن میں کرونا وائرس سے بچاؤ کے لیے مہمانوں اور میزبانوں کو احتیاطی تدابیر پر لازمی عمل درآمد کرنا ہوگا۔کورونا وائرس کی عالمی وبا کے بعد شادی بیاہ کی تقریبات پر عائد کی گئی پابندی کو دبئی حکام نے ختم کردیا۔ شادی اور دیگر سماجی تقریبات کی اجازت دینے کا فیصلہ کیا ہے، یہ فیصلہ دبئی میں قدرتی آفات کو منظم کرنے والی اعلیٰ کمیٹی کے اجلاس میں کیا گیا ہے اس پر عمل درآمد 22 اکتوبر سے ہوگا۔

دبئی کے ذرائع ابلاغ کے مطابق دبئی حکام نے یہ فیصلہ متعلقہ اداروں کی سفارشات پر کیا ہے، قدرتی آفات اور بحرانوں کو منظم کرنے والی اعلی کمیٹی نے بیان میں کہا کہ دبئی کے شہریوں کا کہنا ہے کہ وہ کورونا وائرس سے بچاؤ اور اسے ہھیلنے سے روکنے کے لیے تمام ضوابط کی سختی سے پابندی کریں گے۔
حکام کا کہنا ہے کہ شادیوں اور سماجی تقریبات میں شریک ہونے والے تمام افراد کو ہمہ وقت چہروں پر ماسک پہننا ہوں گے اور صرف میز پر کھانے کے لیے بیٹھتے وقت انہیں اتارنا ہوگا، ایک میزکا دوسری میز سے کم سے کم دو میٹر کا فاصلہ ہوگا اور ایک میز پر صرف پانچ افراد کو بیٹھنے کی اجازت ہوگی۔ تقریب کا دورانیہ چار گھنٹے سے زیادہ نہیں ہونا چاہیے۔

ہدایات میں کہا گیا ہے کہ بوڑھوں اور لاعلاج امراض میں مبتلا افراد کو تقریبات میں شریک نہ کیا جائے، یہ پابندی ان کی سلامتی کو یقینی بنانے کے لیے ہے، زیادہ درجہ حرارت اور کھانسی میں مبتلا افراد تقریب میں شرکت نہ کریں۔