سندھ بھر میں 24 گھنٹوں کے دوران ڈینگی کے 28 کیسز رپورٹ

کراچی: سندھ میں گزشتہ چوبیس گھنٹوں کے دوران 28 کیسز رپورٹ ہوئے ہیں۔

تفصیلات کے مطابق محکمہ صحت نے یکم سے 30 ستمبر تک ڈینگی کے کیسز کے اعداد و شمار جاری کر دیے، ایک ماہ کے دوران صوبے میں مجموعی طور پر 536 ڈینگی کیسز رپورٹ ہو چکے ہیں۔

محکمہ صحت کی رپورٹ کے مطابق صوبے بھر میں مزید اٹھائیس کیس رپورٹ ہوئے، کراچی کے مختلف علاقوں سے 11 ڈینگی کے کیسز رپورٹ ہوئے۔

مٹیاری میں 4 کیسز، حیدر آباد میں 1 کیس، بدین میں 1 کیس، تھرپارکر میں 1 کیس سامنے آیا، جب کہ کشمور، گھوٹکی، سکھر، اور خیرپور میں ڈینگی کا کوئی کیس رپورٹ نہیں ہوا۔

خیال رہے کہ پنجاب میں بھی ڈینگی کے مریضوں کی تعداد میں اضافہ ہو رہا ہے، سیکریٹری صحت عمران سکندر بلوچ نے تین دن قبل بتایا تھا کہ پنجاب کے اسپتالوں میں ڈینگی کے 88 مریض جب کہ لاہور کے اسپتالوں میں ڈینگی کے 51 مریض داخل ہوئے۔

اسلام آباد میں بھی ڈینگی کیسز میں اضافے کا سلسلہ جاری ہے، رواں سیزن اسلام آباد میں 177 ڈینگی کیسز سامنے آ چکے ہیں، جب کہ ڈینگی وائرس سے 2 اموات بھی ہو چکی ہیں۔