‘ونڈر وومن 1984’ کی اداکارہ نے 82 سالہ بلقیس دادی کو ‘ونڈر وومن’ قرار دیدیا

ہالی وڈ اداکارہ اور فلم’ ونڈر وومن 1984′ کی ہیروئین گال گیڈٹ نے بھارت میں شہریت کے متنازع قوانین کے خلاف نئی دہلی کے شاہین باغ میں خواتین کے احتجاج سے شہرت حاصل کرنے والی 82 سالہ خاتون بلقیس بی بی کو خراج تحسین پیش کیا ہے۔

اپنی انسٹاگرام پوسٹ میں گال گیڈٹ نے متعدد خواتین کی تصاویر شیئر کی ہیں جنہوں نے سال 2020ء میں نمایاں کارنامے انجام دیے اور حیران کردیا۔ گال گیڈٹ نے سال 2020 کو الوداع کرتے ہوئے لکھا ہے کہ یہ میری ذاتی ونڈرویمن ہیں، کچھ میرے خاندان سے ہیں ، کچھ قریبی دوست ہیں تو کچھ نے مجھے نہایت متاثر کیا ہے، ان میں سے بعض نہیات متاثر کن خواتین ہیں جن سے میں مستقبل میں ملنا چاہوں گی۔

اداکارہ کی پوسٹ کی گئی تصاویر میں نئی دہلی کے شاہین باغ میں احتجاج کرنے والی معمر خاتون بلقیس بی بی بھی موجود ہیں۔ خیال رہے کہ بھارت میں شہریت کے متنازع مسلم دشمن قوانین کے خلاف احتجاج کرنے پر پولیس نے جامعہ ملیہ دہلی کے طلبا کو شدید تشدد کا نشانہ بنایا تھا جس کے بعد شاہین باغ کے علاقے میں مسلم خواتین نے 101 روز تک پرامن دھرنا دیا تھا، بعد ازاں کورونا وائرس کے باعث پولیس نے زبردستی دھرنا ختم کروادیا تھا۔

ان خواتین کی اکثریت گھریلو خواتین پر مشتمل تھی جن میں 82 سالہ بلقیس بی بی جنہیں بلقیس دادی بھی کہاجاتا ہے نے کافی شہرت حاصل کی، ستمبر میں امریکا کے مقبول جریدے ٹائم نے دنیا کے 100 بااثر افراد کی فہرست جاری کی تھی جس میں بھارتی وزیر اعظم نریندر مودی کے ساتھ دیگر چند بھارتیوں کے علاوہ بلقیس دادی بھی شامل تھیں۔