بلدیاتی انتخابات : بی جے پی کو بڑا دھچکہ، کانگریس کی تاریخی فتح

گورداس پور : بھارتی پنجاب میں سات میونسپل کارپوریشنوں میں سے کانگریس نے چار پر کامیابی حاصل کر لی ہے، سنی دیول کے حلقہ گورداس پور لوک سبھا میں بی جے پی کو تمام 29 نشستوں پر شکست کا سامنا کرنا پڑا ہے اور ان تمام سیٹوں پر کانگریس کامیاب ہوئی ہے۔

پنجاب میں شہری بلدیات کے نتیجے میں تینوں زرعی قوانین کی مخالفت صاف طور پر واضح ہو رہی ہے۔ پنجاب میں آج شہری بلدیات انتخابات کے تحت ووٹوں کی گنتی کی جا رہی ہے، جس میں بی جے پی کا صفایا ہوتا دکھائی دے رہا ہے۔نتیجے میں بی جے پی کے خلاف عوام کی ناراضگی ظاہر ہو رہی ہے۔ ایسے میں کانگریس نے پوری ریاست میں اپنی کامیابی کے جھنڈے گاڑ دیئے ہیں۔

کانگریس نے7 میں سے 4 میونسپل کارپوریشنوں میں کامیابی حاصل کر لی ہے، فی الحال ووٹوں کی گنتی جاری ہے اور جلد ہی نتیجہ سامنے آئے گا۔سنی دیول کے حلقہ گورداس پور لوک سبھا میں بی جے پی کو تمام 29 نشستوں پر شکست کا سامنا کرنا پڑا ہے اور ان تمام سیٹوں پر کانگریس کامیاب ہوئی ہے۔

جہاں تک نگرپالیکا پریشد اور نگر پنچایت انتخابات کے نتائج کا سوال ہے، کانگریس نے یہاں بھی ناقابل تسخیر سبقت حاصل کر لی ہے۔ ووٹوں کی گنتی جاری ہے اور بی جے پی و شرومنی اکالی دل کی حالت کافی خراب ہے۔کانگریس کے امیدواروں نے بیشتر مقامات پر ووٹوں کی بڑی سبقت حاصل کی ہے اور امکان ظاہر کیا جا رہا ہے کہ آج رات تک حتمی نتیجہ سامنے آ جائے گا۔