تیزی سے نیند آنے کے لیے کیا کرنا چاہیے؟ خاتون ڈاکٹر کی ویڈیو نے دنیا کو حیران کر دیا

میساچوسیٹس: ایک امریکی خاتون ڈاکٹر نے اپنی ایک ٹک ٹاک ویڈیو سے اس بحث کا خاتمہ ہی کر دیا ہے کہ بستر پر سوتے وقت موزے پہنے جائیں یا نہیں۔ امریکی ریاست میساچوسیٹس کے شہر وارسسٹر سے تعلق رکھنے والی ٹک ٹاک اسٹار ڈاکٹر جیسیکا انڈراڈے نے ٹک ٹاک پر موزوں سمیت سونے سے متعلق ایک ویڈیو شیئر کی جس نے سوشل میڈیا پر ہل چل مچا دی، اور اب تک اس ویڈیو کو 2 کروڑ کے قریب لوگ دیکھ چکے ہیں۔

ماہر امراض اطفال ڈاکٹر جیس نے ویڈیو میں دعویٰ کیا کہ جرابوں سمیت بستر پر لیٹنے سے نیند تیزی سے آنے میں مدد ملتی ہے، اگر آپ موزے پہن کر سونے کے لیے لیٹیں گے تو تیزی سے نیند کی دنیا میں اتر جائیں گے۔

ڈاکٹر جیس کو بہتر نیند کی تجویز پر مبنی یہ ویڈیو شیئر کرنے کے بعد ٹک ٹاک پر 10 لاکھ سے زیادہ فالوورز ملے، ’Socks to bed‘ کے عنوان سے ان کی ویڈیو میں وہ بتاتی ہیں کہ موزے کیوں آپ کی نیند کو بہتر کر سکتے ہیں۔

ویڈیو میں ٹک ٹاک اسٹار بتاتی ہیں ’آج ان لوگوں کی بات کرتے ہیں جو موزوں کے ساتھ بستر پر لیٹتے ہیں، موزے پہننے سے آپ کے پیر گرم رہتے ہیں جس سے خون کی رگیں کھل جاتی ہیں اور جسم پُر سکون ہو جاتا ہے۔‘ اس کے بعد وہ کہتی ہیں کہ جسم پُر سکون ہوتا ہے تو دماغ کو پیغام مل جاتا ہے کہ اب سونے کا وقت ہے، اس لیے جو لوگ موزے پہنتے ہیں انھیں زیادہ جلدی نیند آ جاتی ہے۔

ویڈیو میں ایک کیپشن بھی لگایا گیا ہے، جس میں بستر پر لیٹتے وقت جرابیں پہننے کو ناپسند کرنے والوں کے لیے اشارہ دیا گیا ہے، لکھا ہے کہ ’میں بستر پر موزے پہنتا ہوں اس لیے مجھے عجیب مت سمجھو‘ تاہم اس کے باوجود اسے ناپسند کرنے والوں نے بھی اپنی ناپسندیدگی کا کھل کر اظہار کیا۔

ایک صارف نے مذاق اڑایا کہ آپ لکھنا بھول گئیں کہ بستر پر موزوں سمیت جانے والے سیریل کِلر بھی ہو سکتے ہیں۔ ایک اور صارف نے لکھا میں احمقانہ چیزوں کا فین ہوں لیکن موزوں کے ساتھ بستر پر جانا، یہ تو آپ نے حد ہی کر دی۔ تاہم ایک بہت بڑی تعداد نے اس تجویز کو بڑی اہمیت دی، ایک صارف کا کہنا تھا کہ میں تو موزوں کے بغیر سو ہی نہیں سکتا، یہ میرے لیے بالکل نارمل ہے۔

ڈاکٹر جیس انڈراڈے نے اچھی نیند کے لیے اور بھی تجاویز دی ہیں، وہ کہتی ہیں کہ بستر پر جانے سے 10 گھنٹے پہلے کیفین لینا بند کر دیں، کیوں کہ اسے اتنی ہی دیر جسم سے نکلنے میں لگتی ہے، اور سونے سے 3 گھنٹے قبل آپ کو کچھ نہیں کھانا چاہیے۔ دو گھنٹے قبل اپنے کام بھی ترک کر دینے چاہیئں تاکہ ذہن کھلنے میں مدد ہو، اور ایک گھنٹہ قبل اسکرین یا ڈیوائسز کو دیکھنا بھی چھوڑ دینا چاہیے۔