بھارت کا عام شہریوں کو نشانہ بنانا انتہائی افسوسناک: عطا اللہ تارڑ

اسلام آباد:وفاقی وزیراطلاعات و نشریات عطااللہ تارڑ نیعالمی نشریاتی اداروں سے گفتگو کرتے ہوئے کہا ہے کہ بھارت نے عام شہریوں کو نشانہ بنایا جو انتہائی افسوسناک ہے۔بھارت نے پاکستان کے چھ مقامات پر حملہ کیا، پاکستان بھارتی جارحیت کی شدید مذمت کرتا ہے۔
بھارت کے حملوں میں خواتین اور بچے جاں بحق ہوئے، نقصان کا تفصیلی جائزہ لیا جا رہا ہے، پاکستان جوابی کارروائی کا حق رکھتا ہے، ہمیں خدشہ تھا کہ بھارت حملہ کرے گا، پاکستان نے جارحیت میں پہل کبھی نہیں کی لیکن ہمیں اپنے دفاع کا حق حاصل ہے، جن مقامات کو نشانہ بنایا گیا وہاں دہشت گردوں کے کیمپ نہیں تھے۔ غیر ملکی اور مقامی صحافیوں کو لائن آف کنٹرول (ایل او سی) کے قریب ان علاقوں کا دورہ کرایا جن کے بارے میں بھارت کا الزام تھا کہ وہاں دہشت گردوں کے کیمپ ہیں۔
بھارت کے پاس پہلگام واقعے میں پاکستان کے ملوث ہونے کے کوئی شواہد موجود نہیں ہیں، پہلگام کا علاقہ لائن آف کنٹرول سے 200 کلو میٹر دور ہے، پہلگام واقعہ بھارتی سکیورٹی فورسز کی ناکامی ہے۔بھارت کی جانب سے شہری آبادی کو نشانہ بنانا انتہائی افسوس ناک ہے، پاکستان دہشت گردی کے خلاف جنگ میں فرنٹ لائن اسٹیٹ ہے، پاکستان خود دہشت گردی کا شکار ہے، ہم اپنے مغربی علاقوں اور سرحدوں پر دہشت گردوں سے لڑ رہے ہیں۔
دہشت گردی کے خلاف جنگ میں ہم نے 90 ہزار جانیں قربان کی ہیں، جعفر ایکسپریس واقعہ رونما ہوا تو بھارت نے اس کی مذمت تک نہیں کی، بھارت خود دہشت گردی کی سرگرمیوں میں ملوث ہے۔