مذہب کے نام پر انتہا پسندی کسی صورت قبول نہیں: احسن اقبال

اسلام آباد:وفاقی وزیر احسن اقبال نے اسلام آباد میں سیمینار سے خطاب کرتے ہوئے کہا ہے کہ مذہب کے نام پر انتہا پسندی کسی صورت قبول نہیں۔اپنی سیاست چمکانے کیلئے ایک سیاسی اور ایک مذہبی جماعت نے ایک بیانیہ بنایا، مذہب کارڈ کھیل کر ملکی معیشت کو تباہ کیا گیا، سیاسی جماعت کے بیانیے سے متاثر ہو کر ایک نوجوان نے میری جان لینے کی کوشش کی، گولی میرے جسم میں موجود ہے، اللہ نے مجھے زندگی دی۔
دنیا میں وہ تہذیب غالب ہوتی ہے جو علم میں آگے ہوتی ہے، آج کون سے یہودونصاری نے ہمارا راستہ روکا ہے کہ علم نہ حاصل کریں؟ دنیا میں وہ قومیں کامیاب ہوتی ہیں جن میں انصاف ہوتا ہے۔آج ہمارے تھانوں، کچہری اور پٹوارخانوں میں رشوت لیتے ہیں، ہمیں یہودونصاری نے تو تلقین نہیں کی کہ آپ رشوت لیں، آج ہمارے برانڈز کی پشت پر یکساں معیار دینے والی طاقت نہیں، کیا یہودونصاری نے ہمیں کہا ہے کہ دودھ میں ملاوٹ کرو؟ ہمیں سازش تھیوری سے نکلنا ہے، کوئی ہمارے خلاف سازش نہیں کر رہا ہم خود اپنے خلاف کرتے ہیں۔