شہریوں کے لاپتہ ہونے پر کسی کو تو جواب دہ ہونا ہوگا،سپریم کورٹ

اسلام آباد:سپریم کورٹ میں کیس کی سماعت کے دوران چیف جسٹس نے ریمارکس دیئے ہیں کہ شہریوں کے لاپتہ ہونے پرکسی کو تو جواب دہ ہونا ہوگا۔ڈاکٹر مہرین بلوچ کی2بچیوں کی حوالگی سے متعلق کیس کی سماعت چیف جسٹس پاکستان عمر عطاء بندیال کی سربراہی میں سپریم کورٹ کے تین رکنی بینچ نے کی۔عدالت عظمیٰ نے لاپتہ بچیوں سے متعلق پیش رفت رپورٹ جمع نہ کرانے پر بربمی کااظہار کرتے ہوئے سیکرٹری داخلہ اورچیف سیکرٹری سندھ کو آئندہ سماعت پر ذاتی حیثیت میں طلب کرلیا۔چیف جسٹس نے کہا کہ چیف سیکرٹری اور سیکرٹری داخلہ سے جواب مانگا تھا لیکن کوئی نہیں آیا۔جسٹس اظہر من اللہ نے ریمارکس دیئے کہ یہ بہت اہم معاملہ ہے،بچوں کو تلاش کرنے پر ریاست مکمل ناکام ہورہی ہے،اگر شہری لاپتہ ہوں گے تو اس کا ذمہ دار کون ہوگا؟ شہریوں کے لاپتہ ہونے پر کسی کو تو جواب دہ ہونا ہوگا۔