سیہون حادثے پر پنجاب حکومت نے سیاست کرنے کی کوشش کی:سندھ حکومت

کراچی:سندھ کے سینئر وزیر شرجیل انعام میمن نے کراچی میں پریس کانفرنس کرتے ہوئے کہا ہے کہ سیہون حادثے پر پنجاب حکومت نے سیاست کرنے کی کوشش کی۔وفاق میں سب سے زیادہ حکومت مسلم لیگ ن کی رہی ہے، اگر سڑکیں مکمل نہیں ہوئیں تو یہ ن لیگ کی وفاقی حکومت کی نااہلی ہے، پنجاب کی وزیر اطلاعات جب شعلہ بیانی کرتی ہیں تو یہ سمجھ لیں کہ جواب بھی آئے گا، ہم جھوٹی باتیں نہیں کریں گے، ہم صرف آپ کو سچ بتائیں گے۔
ہمیں 180ارب روپے ملنے چاہئیں جس سے سڑکوں کو بہتر کریں، ہمارے 180ارب روپے سپریم کورٹ میں پڑے ہیں، سندھ حکومت کے پیسے عدالت میں جمع ہورہے ہیں، پورے پاکستان کی ٹریفک نے سندھ بھر کی سڑکوں پر چلنا ہے، آپ ہم پر بوجھ ڈالتے جارہے ہیں اور ہاتھ پاں بھی ہمارے ہی باندھتے جارہے ہیں۔حادثات میں جانیں جانا کوئی کھیل نہیں، سیہون کی سڑک وفاقی حکومت نے بنانی ہے تو بنائے ورنہ ہمیں بتادیں، ہم وفاقی حکومت سے جائز بات کررہے ہیں لڑائی نہیں کررہے، ہم نے کبھی بلیک میلنگ کی سیاست نہیں کی،وہ دوسری پارٹیاں کرتی تھیں۔
پی ٹی آئی اس وقت جس طرح کی سیاست کررہی ہے یہی ان کو آئینہ دکھانے کیلئے کافی ہے، خیبرپختونخوا میں شام5بجے کے بعد کوئی پولیس چیک پوسٹ قائم نہیں رہتی، خیبرپختونخوا میں 5بجے کے بعد تھانوں کو تالے لگ جاتے ہیں۔خیبرپختونخوا میں آپ کی 15سال سے حکومت ہے، آپ کے 15سال میں بنوں جیل کو توڑا گیا، اس وقت پوری پی ٹی آئی بانی کو جیل سے نکالنے کی کوششوں میں مصروف ہے، خیبرپختونخوا کے عوام امن وامان کے حوالے سے پریشان ہیں، بیرسٹر سیف نے بھی صدر آصف زرداری،بلاول بھٹو کے خلاف بیان دیا ہے، پی ٹی آئی خود چوں چوں کا مربہ تھا۔