سر کا خطاب میرے لئے اعزاز، محنت کا صلہ ملتا ہے: میئر لندن

لندن:میئر لندن صادق خان نے سر کا خطاب ملنے کے بعد نجی ٹی وی کو خصوصی انٹرویو دیتے ہوئے کہا کہ یہ خطاب ملنے پر خود کو بہت عاجز محسوس کر رہا ہوں، یہ اعزاز محنت کرنے والی پوری کمیونٹی کا ہے، میرے والد کو بس ڈرائیور کی نوکری ملی تھی، والدہ کپڑے سیتی تھیں، میرے والدین نے پاکستان سے یہاں آ کر محنت کی۔ سر کا خطاب ملنا اعزاز کی بات ہے، یہاں محنت کا صلہ ملتا ہے۔
سر کا اعزاز ملنے پر والدہ بہت جذباتی ہوگئی تھیں، ہم سب والد کو یاد کر رہے تھے، بچے مذاق کر رہے ہیں کہ گھر میں آپ سر نہیں صرف ہمارے والد ہیں، میری کامیابی ٹیم ورک کا نتیجہ ہے اور یہ ایوارڈ بھی پوری ٹیم کیلئے ہے۔بادشاہ سے خاصے اچھے تعلقات ہیں، وزیراعظم بھی میرے دوست ہیں۔
برطانیہ کے بادشاہ چارلس کی جانب سے سالِ نو کے موقع پر جن افراد کو عوامی خدمات کے اعتراف میں اعزاز سے نوازا گیا ان میں میئر لندن صادق خان کا نام بھی شامل ہے، جنہیں نائٹ کے اعزاز پانے والوں کی فہرست میں شامل کیا گیا ہے۔