گزشتہ ہفتہ پاکستان اسٹاک ایکسچینج کے لیے کیسا رہا؟

کراچی: گزشتہ کاروباری ہفتے کے دوران پاکستان اسٹاک ایکسچینج میں کمی دیکھی گئی، 100 انڈیکس 40 ہزار 70 پوائنٹس پر بند ہوا۔

تفصیلات کے مطابق گزشتہ ہفتے پاکستان اسٹاک مارکیٹ میں 100 انڈیکس میں 16 سو 30 پوائنٹس کی کمی دیکھی گئی جس کے بعد 100 انڈیکس 40 ہزار 70 پوائنٹس پر بند ہوا۔

ایک ہفتے کے دوران انڈیکس میں 3.9 فیصد کمی ہوئی۔

گزشتہ کاروباری ہفتے (28 ستمبر سے 2 اکتوبر 2020) کے دوران 68 ارب کے 1.95 ارب شیئرز کا کاروبار ہوا۔ گزشتہ ہفتے مارکیٹ کیپٹلائزیشن بھی 280 ارب کم ہو کر 7 ہزار 538 ارب رہ گئی۔

گزشتہ ہفتے ڈالر کی قیمت میں بھی کمی دیکھی گئی، ہفتہ وار رپورٹ کے مطابق ایک ہفتے میں انٹر بینک میں ڈالر 1 روپے 28 پیسے سستا ہوا۔

1 روپے سے زائد کمی کے بعد انٹر بینک میں ڈالر 165 روپے 79 پیسے سے کم ہو کر 164 روپے 50 پیسے پر آگیا۔

گزشتہ ہفتے میں اوپن مارکیٹ میں ڈالر 1 روپے 40 پیسے سستا ہوا جس کے بعد اوپن مارکیٹ میں ڈالر کی قیمت 166 روپے 20 پیسے سے کم ہو کر 164 روپے 80 پیسے ہوگئی۔