اسرائیل کا پہلی بار اسماعیل ہنیہ کو شہید کرنے کا اعتراف

تل ابیب: اسرائیل نے پہلی بار عوامی سطح پر حماس کے سربراہ اسماعیل ہنیہ کو شہید کرنے کا اعتراف کر لیا۔اسرائیلی وزیر دفاع اسرائیل کاٹز نے کہا ہے کہ ہم حوثی رہنماں کے ساتھ بھی وہی کریں گے جو ہم نے اسماعیل ہنیہ، یحیی السنوار اور حسن نصراللہ کے ساتھ کیا۔ حوثیوں کو واضح پیغام دینا چاہتا ہوں کہ ہم نے حماس اور حزب اللہ کو شکست دی، ایران کے دفاعی اور پیداواری نظام کو نقصان پہنچایا اور شام میں بشار الاسد کی حکومت کو گرا دیا۔کاٹز نے مزید کہا کہ اب ہم حوثیوں کے اسٹریٹجک انفرا اسٹرکچر کو نقصان پہنچائیں گے۔
فلسطینی مزاحمتی تنظیم حماس کے سربراہ اسماعیل ہنیہ کو رواں سال جولائی میں اس وقت شہید کیا گیا تھا جب وہ ایران میں صدر مسعود پزشکیان کی تقریب حلف برداری کے لیے تہران گئے تھے مگر اسرائیل نے اس حملے کا اعتراف نہیں کیا تھا۔